Afër 5.000 turistë britanikë janë larguar nga Turqia pas falimentimit të operatorit turistik Thomas Cook në fillim të javës, transmeton Anadolu Agency (AA).

“Gjithsej 4.920 turistë janë rikthyer në vendet e tyre përmes 21 fluturimeve”, tha në një deklaratë Zyra e Guvernatorit të qytetit turistik Antalya në jug të Turqisë.

Në deklaratë thuhet se janë duke vazhduar përpjekjet për kthimin e sigurt të turistëve britanikë që erdhën në Antalya përmes rezervimeve të operatorit britanik.

Operatori turistik dhe linja ajrore britanike i dha fund veprimtarisë “me efekt të menjëhershëm”, njoftuan autoritetet britanike të hënën.

Rënia e operatorit ikonik 178-vjeçar erdhi për shkak të vështirësive financiare dhe dështimit për të siguruar një marrëveshje prej rreth 1,1 miliardë funtash.

Rreth 150.000 persona do të ndikohen nga rezervimet dhe fluturimet e anuluara.